हमरा खातिर त जनते जनार्दन बिया, कहलें निरहुआ.............

प्रतिज्ञा, दिवाना, हो गइनी दिवाना तोहरा प्यार में, चलनी के चालल दुलहा, प्रेम के रोग भइल, आ परिवार जइसन फिलिम निरहुआ के साम्राज्य पसारत चल गइली सँ आ आजु कईएक मामिला में निरहुआ दोसरा से आगा निकल चुकल बाड़े. भोजपुरी के ले के, भोजपुरी के रस्ते, आ भोजपुरी का वास्ते निरहुआ दक्षिण का फिल्म उद्योग में घुसे वाला पहिला भोजपुरी अभिनेता बन गइल बाड़न. मूवी मुगल डी रामानायडू त दिनेश के दिवाना हो गइल बाड़े. एह साल का योजना का बारे में निरहुआ से भइल बातचीत के कुछ हिस्सा एहिजा दिहल जा रहल बा

२००९ में त रउरा नम्बर वन रहबे कइनी, एह साल के धमाका का होखी ?

जवना बात के परिणाम रउरा हाथ में ना होखे ओकरा बारे में बस अन्दजे लगावल जा सकेला. हमार सारा कमाल त जनता जनार्दन का हाथ में बा. उठा लिहलस त आसमान चढ़ गइनी, फेंक दिहलसि त पताले चल गइनी. एह मामिला में हम कुछ अधिका खुशनसीब जरुर बानी. एह साल के शुरुआत होखी बी॰ओबुलरेड्डी के फिल्म निरहुआ नम्बर १ से जवना में हमार अन्दाज कुछ अलगे देखे क मिली. एहमें हम पण्डित आ डॉन का भूमिका में बानी. नायिका बाड़ी पाखी हेगडे. एकरा बाद आई तीन गो बिग बजट फिलिम. ओहु तीनो में हमार आ पाखी जी के जोड़ी बा. फिलिम हईं सँ राजकुमार आर पाण्डेय के सात सहेलियाँ, डी रामानयडू के शिवा, आ अभय सिन्हा के करण अर्जुन. सात सहेलियाँ के किसना के सात गो नायिका बाड़ी सँ. ई एगो अद्भुत फिलिम होखी जवना के राजजी बहुते बढ़िया से निर्देशित कइले बानी.

डी रामानायडू के शिवा के चर्चा त शुरुवे से हो रहल बा. कुछ ओकरा बारे में ?

डी रामानायडू का शिवा में हम टाइटल भूमिका में बानी. एहमें हमार एक्शन के कमाल देखे के मिली. निर्देशन जी सुब्बाराव कइले बाड़े आ शूटिंग हैदराबाद आ दक्षिण भारत के कई गो मनोरम जगहन पर भइल बा. एह फिलिम से हमरा बहुते उमेद बा.

कतना फिलिम हो गइली सँ राउर ?

अबही ले २२ गो फिलिम रिलीज भइल बाड़ी सँ जवना में १८ गो हिट रहल. छह गो त रिकार्ड सफलता पवली सँ.

गंगा जमुना सरस्वती में पहिला बेर रविकिशन, मनोज तिवारी, आ रउरा के देखे के मिली. ओकरा बारे में ?

गंगा जमुना सरस्वती में पहिला बेर रवि भईया, मनोज भईया, हम एक साथे काम कर रहल बानी जा. भोजपुरी के ई अबले के सबले बड़हन फिलिम होखी. आलोक कुमार के बनावल आ हैरी फर्नाण्डिज के निर्देशित एह फिलिम में हम सरस्वती का भूमिका में बानी जे एगो अनाथ लड़िका ह. अबही बस अतने बतावल जा सकेले.

एकरा अलावे कुछ अउरी बा ?

बा नू. रमाकांत प्रसाद के दाग, जवना के शूटिंग फरवरी में शुरु होखे वाला बा. प्रवेश सिप्पी के मृत्युञ्जय, संजय सिन्हा के लोफर, असलम शेख के रखवाला, आ अभय सिन्हा के रणभूमि.

मतलब कि फेर छक्का लगावे के बा ?

सब रउरा लोगन के प्यार ह, ना त निमन निमन तीसमार खाँ लोग एलबी डब्ल्यू हो के पैवेलियन लवटि जाला. फेर कहेम कि हमरा खातिर जनते जनार्दन हियऽ.